FUXIDE, ORICIOS! (maqueta, MC, 1993 )

Pel añu 1993 llevábemos pocu tiempu trabayando col grupu, pero bien intensu. Depués d'una primer maqueta fecho en Salamanca en 1992 -otro de que nos sirvió pa curtinos nesto de grabar, nun tuvo trascendencia denguna-, nesta primer etapa de Felpeyu ficimos dellos cambeos fundamentales pal nuestru soníu. Pegamos el tan comprometíu saltu d'afinación: na parte asturiana, Ruma cambeó la so gaita vieya por otra en Bb (del mesmu fabricante, Manolo Quirós); na gallega, Félix pasó a encargase de toles gaites ( tamién garró una uilleann pipe), que pasaron a tar en D, y Cástor centróse nes flautes, mandando al chinflu la de metal y mercándo-y al irlandés Hammie Hamilton dos flautes de madera en D y Eb. Too ello benefició enforma a les posiciones qu'empleaba Ígor cola guitarra y el bouzouki nuevu (que-y llegara hai nada del taller del inglés Stefan Sobell), que garraron muncha más potencia, amás d'ufiertar un contraste perguapu ente los arranchos asturianos (básicamente en Bb/Eb) y los gallegos (en D/A). Tábamos arranchando delles coses que funcionaben perbién, y Xelín -que d'aquella taba trabayando'l repertoriu na guitarra acústica, cola idea d'entrar nel grupu pa qu'Ígor tocara'l bouzouki dafechu- taba poniéndose fechu un animal. En xeneral teníemos la sensación de qu'entamábemos a sonar d'una mena que mos prestaba, asina que pensamos que yera'l momentu d'esperimentar grabando una maqueta.

La primer intentona ficímosla nel Taller de Música Xoven do Concello de Ourense, au consiguimos un proyectu pa grabar una selmana. Rexistramos unos ocho temes, y los medios técnicos foron bonos, lo que supuso una esperiencia importante pa garrar callu y planteanos cuestiones relatives a la producción musical. Con eso y con too nun quedamos mui contentos colos resultaos, y siguimos pensando au facer otra maqueta curioso.

Yá n'Asturies, pegámos-y un toque al nuestru collaciu Carlos Redondo -el probe nunca foi quién a dase cuenta de les consecuencies de la rellación qu'entamaba- pa que nos ficiere la producción y nos asesorare nel tema técnicu. Escoyimos un estudiu piquiñín y bien afayaízu que tenía montáu un conocíu d'él, Xuan Mollano, na so casa en Posada de Llanera, y col que taba arrancando nestes llabores de inxeniería de soníu -más palantre, Mollano, xunto col so sociu, ampliaríalu hasta convertilu nos conocíos estudios Búnker de Posada-. El bar Antonio punxo'l material funxible (del que Felpeyu siempre dependió y dependerá pa trabayar curioso) colos sos inconmensurables pinchos, y yá lo teníamos too pa entamar a trabayar. La grabación foi perprestosa, y- lo más importante pa que salgan bien les coses-, bien célebre.

Del amiestu y selección de los temes de les dos grabaciones surdió FUXIDE, ORICIOS! Como una maqueta que ye, cumplió la so función; sirviónos pa danos cuenta de munches carencies, pero tamién pa descubrir los aciertos, y diónos pistes pa siguir trabayando: qué arranchos funcionaben y cuáles non, qué onda queríemos pal nuestru grupu, qué estilo mos interesaba. Dellos arranchos de la maqueta terminaron dientro'l nuestru primer cd, FELPEYU; a otros siguimos teniéndoyos munchu cariño, y nun desestimamos la idea de volver rexistralos nel futuro. Nel aspectu gráficu tamién atopamos delles claves: la nuestra mascota, el Felpeyín; l'enfotu por grafismos ambiguos y personales, y una pasión polos oricios qu'entá daría pa muncho. Ensin FUXIDE, ORICIOS!, FELPEYU nun sería'l mesmu.


Cástor Castro: frauta traveseira, cítara
Félix Castro: gaita galega, tin whistle, pito galego, uilleann pipes
Ruma Barbero: gaita asturiana, bodhrán
Ígor Medio: guitarra, bouzouki, mandulina, banjo, baxu pedal, voz
Xel Pereda: guitarra, coros

Andecharon con nós:
Lluis Medio: coros na Raitana
Carlos "Llocu": baxu na Carballesa

Semeya de portada: Son
Diseño: Javier Rodríguez
Igües: Felpeyu

1, 2, 4, 5, 8 grabaos y mezclaos nos estudios M. Bar, Posada de Llanera (Asturies)
Técnicu de soníu: Xuan Mollano
Productor: Carlos "Llocu"

3, 6, 7 grabados e misturados no Taller de Música Xoven do Concello de Ourense (Ourense)
Técnicu de soníu: Lusquiños
Productor: Felpeyu


CARA A

1. PATAGÜEYU
· Fandango de Xixón-Uvieo (trad)
· Pasucáis (trad)
· Candanín (trad)

2. CARBALLESA
· Muñeira de Ramelle (trad)
· Carballesa de Incio (trad)

3. FANDANGOS DE L.LEITARIEGOS
· Fandangos (trad)
· L'Ablanera (trad/Í. Medio)

4. MUÑEIRA DE TRANDEIRAS
· A Camposa (X. Romero Suárez)
· Muñeira de Trandeiras (trad)


CARA B

1. LA RAITANA (lletra: Pin de Pría)

2. MUÑEIRA DO PENEDO
· Muñeirado Penedo (X. González)
· Muñeira das Cernadas (X. Amado)
· Muñeira da Costa (trad)

3. ENTAMA UNA XIGA (C. Castro)

4. EL QUIROSANU
· Los Playos (R. Barbero)
· El Quirosanu (trad)
· Pasacái los Güeyos (R. Barbero)