HARVEST
Celtic Connections, Glasgow Royal Concert Hall, 14/01/04
Ígor Medio
La presente edición del prestixosu festival Celtic Connections inaugurose'l pasáu miércoles 14 de xineru en el Royal Concert Hall de Glasgow col conciertu HARVEST (coyecha). L'espectáculu, un proyectu del músicu escocés Donald Shaw (perconocíu pol so trabayu col grupu Capercaille) foi nomau asina en referencia a los brillantes músicos mozos escoceses que van surdiendo ininterrumpidamente dende hai una década en toles partes d'Escocia, y algamando una calidá ensin precedentes gracies a iniciatives como'l movimientu Fèisan de les Highlands y les escueles de música sites n'Edimburgo y Glasgow. D'esta Œcoyecha¹ de xóvenes virtuosos féxose una selección de 77 mozos y moces d'edaes ente 13 y 21 años, xuniendo una auténtica orquesta compuesta por secciones de vigulinos, cellos, curdiones, small pipes, whistles, flautes, guitarres, bouzouki, saxo, piano, voces y una banda de gaites escocesa al completo. Dirixía con mano mayestra pol músicu escocés Donald Shaw, ésti incorporó-y amás un repartu estelar de músicos de les naciones celtes europees (Escocia, Breizh, Eire, Galicia, Asturies) col ánimu de xunir la amplia escena folk europea cola prósima xeneración de músicos escoceses.
Escocia taba enforma representao: amás de Donald Shaw, que nun dio a bastu ente la dirección de tal bandona y la so propia execución a la curdión, piano y teclaos, taben presentes otros Capercailles como Karen Matheson (voz), Charlie McKerron (vigulín) y Ewen Vernal (contrabaxu), que xunto con James MacIntosh (batería y percusión) punxo la solidez y seguridá necesaries pa construyir les bases rítmiques de semeyante 'dinosauriu' musical. La base rítmica completáronla Jim Sutherland (percusión) d¹Escocia, Soïg Siberil (guitarra) y Gilles le Bigot (guitarra) de Breizh, Guillermo Fernández (guitarra) de Galicia y Ígor Medio (bouzouki) d'Asturies. Como solistes taben Aidan O¹Rourke (vigulín) d¹Escocia, Michael McGoldrick (flauta y uilleann pipes) d'Inglaterra/Eire, Jean-Michel Veillon (flauta) de Breizh, Gerry O'Connor (banjo) d'Eire, Xose M. Budiño (gaita galega) de Galicia y Jose M. Tejedor (gaita asturiana y low whistle) d'Asturies. Nel apartau vocal, a los xóvenes cantantes escoceses xuntáronse Denez Prigent de Breizh, Karan Casey d'Eire, Guadi Galego de Galicia y el cantante asturianu Chus Pedro.
 |
|
En dalgo menos de tres hores, el públicu de Glasgow pudo disfrutar d'un repertoriu de folk d'una variedá y calidá como poques veces da en xuntase nun escenariu. Les pieces instrumentales foron estremaes: un carráu d'elles compuestes por Shaw y otros solistes como McGoldrick, Budiño o Tejedor; delles otres tradicionales del folklor de los países convocaos, y toes xuntaes en sets preparaos pa la ocasión polos músicos en dos díes d'ensayos previos.
El conciertu entamó con un cantar a capella de la más piquiñina del grupu, la neña escocesa Emma MacInnes, siguío d'una versión bien sólida de una Gavotte bretona cola que se presentó tola banda. Ésta pieza dexó perclaro el saleru y la calidá qu'atesoraba la sección moza de la orquesta, que nun fadría más que meyorar en cada tramu del conciertu. Temes como'l set Famous Last Words (composición de Shaw so ritmos irregulares), los reels a mediu tiempu de Tiree Girls, les xigues d'Aurora, Setestrelo (guapísimu cantar compuestu por Galego/Fernández pal so grupu Berrogüeto) o el poderosísimu E Garnison de Prigent marcaron la diferencia. El repertoriu asturianu tuvo representau poles aclamaes Muñeres d'Avilés y Etna de Tejedor, y los cantares tradicionales asturianos del caberu discu de Chus Pedro, Baxé al camín de La Pola y Verdiciu, arranchu ésti últimu qu'entusiasmó al públicu del Concert Hall. Dellos solos de J. M. Veillon, Karan Casey o Denez Prigent dexaron perclaro la calidá individual de los músicos ellí presentes y terminaron d'ablucar al personal.
 |
|
Como'l caberu bis, los músicos improvisaron un set combináu con entraes y salíes d'instrumentos estremaos: entamu xeneral con un reel clásicu escocés, solu de flautes, solu de vigulines, solu de banjos (Gerry O'Connor y una neña de non más de 17 años marcáronse un mano a mano dignu de Dueling Banjos que plasmó hasta a los músicos que los arrodiaben), un vertixinosu set astur-galegu (Saltón central axuntau a Aires de Pontevedra, interpretau polos músicos asturianos y galegos a dos gaites, bouzouki y guitarra), y vuelta al reel escocés pa rematar con tola banda.
Harvest foi un acontecimientu estraordinariu, pola so calidá pero principalmente pola so esclusividá. Nunca, que tengamos constancia, nun se fexo nada d'esta mena y proporción nun conciertu de música folk. Donald Shaw asumió un riesgu superlativu -y equí radica la grandeza del retu- organizando un espectáculu de ciento cincuenta minutos con un repertoriu inéditu na so práctica totalidá, protagonizáu por músicos mozos y inespertos procedentes d'escueles estremaes, cola presión de tocar na apertura del festival más importante, nel escenariu más imponente, y arrodiaos por músicos que son el so auténticu referente musical. Hebía non poques duldes acerca del resultau; afortunadamente pa Shaw -y pa la música folk en xeneral- la xugada salió-y redonda. Harvest foi un completu ésitu, y daqué pa tener en cuenta de cara a posibles iniciatives asemeyaes nel folk internacional en xeneral y asturianu en particular. Depués de superar con creces la so prueba de fueu, la nueva xeneración de músicos escoceses yá ta equí. Y vienen pa quedar.
|
|
