La reellaboración de la música tradicional d'Asturies nuna llinia paralela a les tendencies que se dan anguaño nel folc europeo ye l' oxetivu del trabayu del grupu FELPEYU. Pa ello, servímonos d'una instrumentación, unes técniques interpretatives y unos arranchos colos qu'algamar tal fin; asina, facemos el nuestru soníu amestando una instrumentación que vien de la tradición popular asturiana cola que vien d'un ámbitu européu, atlánticu... más xeneral y d'agora, ensin perder el soníu acústico.

Les fontes que nos proporcionen el material colo que trabayamos son estremaes: cancioneros de música popular, partitures y manuscritos de música coral harmonizao de cantares populares, archivos sonoros de grupos d'investigación etnográfica, la música popular que ta nel ámbitu diariu y, a la fin, los arranchos propios con un oldéu a estructures y ritmos tradicionales.

En FELPEYU consideramos como espaciu primeru de divulgación de la nuestra música el de tola sociedá asturiana, pa la que va dirixíu'l nuestru trabayu y del que ye depositaria. Esto ye, considerámonos un elementu más del procesu de recuperación y dignificación de la cultura d'Asturies.


Baxar curriculum de FELPEYU en formatu PDF (zip)

 

Diseñu y Realización:
Ígor Medio y Luisa Colado