Nel mes d'ochobre de 2011 fixeron yá venti años qu'entamamos esti proyectu musical. Unu nun sabe onde va parar un grupu de la que lu echa a andar. A FELPEYU tenémos-y asociaos munchos de los meyores momentos de la nuestra vida y tamién ún de los peores, pero equí siguimos. Yá percorrimos cuatro de los cinco continentes llevando la música d'Asturies a catorce países y lo que nos queda.

La reellaboración de la música tradicional d'Asturies nuna llinia paralela a les tendencies que se dan anguaño nel folk européu sigue siendo l'oxetivu del trabayu de FELPEYU. Pa ello, servímonos d'una instrumentación, unes técniques interpretatives y unos arranchos colos qu'algamar tal fin; asina, facemos el nuestru soníu amestando una instrumentación que vien de la tradición popular asturiana cola que vien d'un ámbitu européu, atlánticu... más xeneral y d'agora, ensin perder el soníu acústicu.

Les fontes que nos proporcionen el material colo que trabayamos son estremaes: cancioneros de música popular, partitures y manuscritos de música coral harmonizao de cantares populares, archivos sonoros de grupos d'investigación etnográfica, la música popular que ta nel ámbitu diariu y, a la fin, los arranchos propios con un oldéu a estructures y ritmos tradicionales.

En FELPEYU consideramos como espaciu primeru de divulgación de la nuestra música el de tola sociedá asturiana, pa la que va dirixíu'l nuestru trabayu y del que ye depositaria. Esto ye, considerámonos un elementu más del procesu de recuperación y dignificación de la cultura d'Asturies.

oriciu